Comment l’arrogance, la cruauté et le manque de respect d’un homme abouti à une peine énorme.

Tiré de l’album CBC Audio, Volume 9 : Legends of the Ilnuatsh from Mashteuiatsh, Québec / Légendes des Pekuakamiulnuatsh (Montagnais du Lac-Saint-Jean)

Transcription:

*À noter que le texte a été transcrit dans les années 2000 et que l’orthographe en Nehlueun peut être différente de celle d’aujourd’hui*

Nika tapatshimun nutish ahue, … katshi ueshkatsh tatipanatshanutsh man aitan ahue ekuan nete e tapatshimuian ahue, mashk^u kie mak ilnu, ilnu ueshkatsh ahue ka mashtshetau nipa ituen ahue mashk^u ilnu mak.

Ueshkatsh nete eshke kalipua kassinu aueshissatsh man katshi aimihitetau man ahue. Tshi teu nete ilnu utenatsh. Peik^u napeu nete e mishta mishishtat, ahue mishishtat kie mak e shutshitsh tshia, e shutshimashkatsh.

Peikua mak nete nashpeu nete nashpetamatsh nitu kanuapitam shakahianiu tan ishanakunilitsh. Uipatsh nelu tshetshishepaushun ekun nelu itutet nete shakahikan. Katshi takushiek nete shakahikan uapitek ne shakahikan, ne mishta  miutshe ka miututsh ahue, tanite nipa ituen, miam peikun euh…, shakahikan ekun eka utsh, ekun mak ne itelitam, itelitam nelu tshetshi tshekamahik nelu shakahikaniu. Tshetshi natuapitek nete shipiu nete takaniu, apu nita utsh uapatek nelu, ek mak nutshish tshipatshi nituapatem nelu.

Ek kalipua tshe ui aiatshit tshetshi ashuhak ne shakahikaniu tukushek nete u mitshuatsh. Pitsheu eku petsh e tshekuetat nelu tshekuanam utshekuanam tshe pushtat nete e tshikamahak kassinu umitshim. Tshetshi nitualitek putsh utshikualim. Ek tshe e tshikamahak tapue, tshe ui tshikamahak.

Kukuetshimakanu ahue utishkuem nete kunuapameku nelu aitek. Ekun ne itat, tan aitin? Tanite itetan? Ah, iteu nui tshikamahen ume shakahikan, ahue,  nui nituapatan nete shipi tanite ishinakutsh ihu. Ne shipi, ui alimutakanu ne shipi apu tatsh nutsh uapatan ahue ne shipi ekun mak tshe nituapataman nete itueu nelu utishkuem.

Katshi uetshishk mak tshe pushetsh nelu ututsh. Tshe tshekamahak ne shakahikaniu. Katshi mak pimashkatsh uelapishish naka…, nakaham nete.

Tsheke uapitek nete kassinu uashkata ishinakunish. Tanite itat! Apu tshekualu nukunilitsh ahue. Nete kutak ui uapatak. Nete ashtamitatsh uapitam kie e ueuapataman kalipua utenauiu eshk^e nete.

Ek minuatsh e pimishkatsh. Uiesh tshinuash pimishkau ek minuatsh e nakapilitsh ahue, nakahak. Shashi nitshitin e nishtem uapitim. Ek kalipua uapitim eshke e piputetsh nete, eshke taui nete uetshitsh.

Ek nete pishumutat ahue e uapitek minuatsh apu tshekualu uapatek. Ek nete uapatek apu tshekualu uapatek ek mak nete e tshiuesse uapitek apu uapitek tshekualu.

Eku minuatsh tshe mishkatsh ahue, tshe ui mishekatsh nete akamatsh. Min uelipishish minuatsh ahue, nikapiu nete minuatsh, uapatek kalipa kassinu uashka nete, apu uapitik tshekualu, tshek apu uapatik tshekualu. Ekun nete tshe eshe mashikatsh uapitim nete nelu kutak tshekuaui miam e uipauitsh tshekuaui e tshikamahiek, e tshikamahak ne ship miam ne shakahikan ishinakun man nishtam^u esh uapitik.

Uapitim nete tshekuaui e mishakatsh. Apu  nishtunuatsh ek put tshe mishta mishkatsh tshe ui atamuat nelu tshekuaui nete ka mashkatsh neteshe. Shakahikan makie shipi, apu nishtunek tapue ahue.

Katshi takushik mak nete uapameu nete tshekuaui e mashkaitsh. Peshuamueu tshia kau, nishtuneu, mashk^u nelu e mashkaitsh. Ek pessish tshe mashkatsh ma nelu mashk^u ek tshe aimiatsh nelu mashkue.

Itueu : mashk^u ahua tshil mashk^u ahue? Eshkukua tshutshinaue ishnakushin ahue! Nil atutu nishutshin ahue! Tshe tshikamahen kassinu shakahikan ahue! Ek tshil ahue, miam e uieshkushin eshinakusin ahue, nil ui apu e uieshkushian, mit apu eishkushian.

Tshi itukun mak nil, tshe mishta tshutshin, apu tapuetaman, itakanu mashk^u. mashk^u ui apu ui itepelimat ne ilnu, napeu imit ahue, at mak ne ilnu.

Ekue tshe mishkatsh kie uil mashk^u tshe ui meshikatsh nete akam ka ui meshikatsh. Katshi takushik nete akamatsh, ueishin nete pessish shipish, shipish tshe tshikaham nutshish. Eka itueshik nete ashtueishiu, eieshkushiui kalipua. Ek uil napeu ahue, tshe kapak kie uil nituapemeu ne mashk^u uapimeu kalipua ekun etat ahue, kuesha mashk^u ahue eshkash, tshetshi eshkushinaue itakanu.

Nil ui apu eshkushian mak apu eshkushian tshi tshikamahen mak shakahikan nutshish. Ek tshil mashk^u miam pekun ahue, e mishta eieshkushin ahue, ek nil apu nita eishkushian ahue. Ek apu ui mashk^u apu uiesh ituet. Tshek ma napeu itueu : nepa milueteun ahue e mashitshek ahue. Auen atutu aitete shutshikueu! Mashk^u uil apu ui mashitshet.

Tshek ma eshke put e malelimat nelu mashk^u nitamuk itat ma, e malelimat. Eku kassinu ishinikashune e miat mak  e malelimat nelu mashkueu.

Tshek apu mashk^u ahue, etelitamukue apu… Ka mashautsh kalipua ne napeu tshek apu tshe pashikutsh tshe muk e nishutau. Tshek mak kupiutsh netshe mishtukutsh netshe pessish etatau. Kassinu niut, taputumetaut nete e mashitshetau.

Tshek ma ashitinakanu napeu nete, ek apu tshi matshit napeu kie. Iteu mak ne mashk^u ekun, ekun mashk^u ekun itakanu shash tshil itatu tshe tshutshin. Shash ka punin ahue, itakanu ne mashk^u, nika tshiuen nil ahue.

Ekupa mashitshe, e pashikutsh kie uil etshe e tshitutet ishinakushet. Apu tshe aimit, muk kie apu aimiat ne napeu. Eku tshe pashikutsh kie uil napeu ek uapameu e pimutet ne mashkue ahue. Ek mamitelitem kalipua napeu. Apu tshi akushit ne napeu, apu tshe akushit, apu… Nitut apu akushian ahue, nipatshi mashitshau minuatsh apishish.

Tshetshi tshisseltaman atutu nil nishutshin tshetshi uitamuk. Tshetshi tshisselitek kie mashk^u nil atutu nishutshin. Ek kalipua minuatsh tshe ui aitumuat nelu mashk^u ne kalipua itutet. Tshek ma min takushin nete mashk^u e pessish e tait. Ekun itait minuatsh mashk^u , tapue mashk^u ahue. Nil atutu nishutshin ahue, iteu nilu mashk^u, tshil apu shutshin, mitun apu shutshin, apu akuin ahue, apu tshe akuin netehi. Akuin apishish kalipua tshe kassipitakanu napeu muk tshe akuhakanu tshetshue tshetshi akushit itelitem kalipua.

Ek kalipua tshetshi mashat minuautsh nelu mashk^u, iteu. Nui mashitshen ahue mashk^u ahue, nui tshekua piliten nutshish nil atutu eshutshian. Kalipua mituin mashk^u apu ui mashishetsh kie mak tshetshi itat tshekualiu a tshetshi uitamuat apu ui mashitsheian apu aimit mashk^u ahue, muk uapimeu nelu napeu e malelimakuniut mashk^u ahue. Tshek ma napeu, malelimeu minuatsh nelu mashk^u malelimeu. Kassinu mak itat tshekualu tshetshi akuat matat mashk^u tshetshi, tshetshi mashitshet ma tan.

Tshek ma eshpish malelimakanut mashk^u kie putshe tshe matshet minuatsh ahue. E pashikutau mak tshe mashitshetau. Ek kalipua minuatsh tshek kulipehatau e mishta piuelimat kie mak nelu ashini nete ka ishtet ek uepahutau, kuhapahatau nelu ashiniu.

Tshek ma min ashetenakanu napeu nete assitsh e pimashik. Ek aiashikueu kalipua napeu, ekun, ekun, ekun, itueu nelu mashk^u shash, shash tshikaniun, tshil atutu tshi shutshin ahue. Ekun tshe tshiueian nil. Ek kalipua mashtel tshe pishukutsh minuatsh tshe… ne napeu tshe pishukutsh kie uil.

Ek uapimeu mak nelu mashk^u ahue, e pimutet tshe tamutet mak ahue, ekun nete. E tukusset tshe itet mashk^u ahue, ishinakushit ahue. Tan apu tshe imita ahue, apu tshe aimiat kie ahue, napeu e aimiat peikun. Tshe mishta malelimakunut mak iapitsh mak apu aimiat.

Eku kalipua katshi pishukutsh ne napeu uapimeu minuatsh ne mashk^u itumutetsh. Ek ma itelitek, ka ma minuatsh peikua. Tshe mashikuk mashikut nepa kaniun itelitem ahue. Nepa kaniun mashikut, nika nipahau e kaniuane ne itelitem ne napeu. Ek kalipua tshe katshessimat nelu mashk^u katshi pessish mak nete etat ne mashk^u ekun etat minuatsh. Tsheke ui mashitin minuatsh peikua mashk^u. Ek tshi tshisselitiman nil atutu tshi shutshian. Ekun itat nelu mashk^u. Uish nil atutu ne shutshin iteu nelu mashk^u. Ek kalipua mashk^u ui… apu tshekualu itat uil. Muk uapimeu nelu napeu e imiat e aimiakunut e aimiat mak nelu mashk^u.

Katshi mak min malelimakanu kalipua mashk^u ahue, mishta malelimakanu minuatsh kalipua. Nitumuk tshekualu itakanu tshetshi kalipa akuakanu mashk^u tshetshi tshuakanut ahue. Tshetshi mashitshet minuatsh tshek mak kalipua. Itelitem mashk^u kalipua minuatsh tshe mashik utanu napeu mush kamalilemek ahue.

Ek muk nipu nutshish, nipunanun muk nutshish  ahue e mashitshenanutsh. Ek kalipua mashk^u ahue minuatsh tshi ui…ek kalipua napeu ui shitineu nelu mashk^u apu tshe shitinat nitamuk… mashk^u ui nanipu muk peikuau utamaheu nelu ilnu. Ek kuesha kaishepuakuanut nete kutak patshin ne napeu. E tshishkueuakanut kalipua.

Pemishin nete ahue nete epemishik miam peikun kalipua katshi ne napahakanut etet…,etelitakutsh ahue. Muk peikua mak nehe tshi utamuakanut. Ek peikupeik mak ne napeu. Tshishat aiashukueu ekun, ekun mashk^u, ekun mashk^u tshe mishta akuin nutish itakanu mashk^u. Ek tshi pulian e malelimitan iteu, ituheu nika tshiuen.

Nete nutenatsh, utenatsh ka ututeian ekute minuatsh tshe iteteian, itakanu ne mashk^u.

Ek kalipua tshe tshiuet ne napeu, tshe pushitsh nete ututsh. E tshikamahak minuatsh nelu shakahikaniu ka tshikamahak tsheshtshepanitsh ahue. Katshi tukushik ne utenatsh. Kapau nete kalipua.

Uapamakanu kalipua, kassinu ilnutsh nete, naniputsh nete, uapamakanu nete napeu e kapat. Katshi kapat mak miam umuku kalipua nete kassinu kie tshi kassipitakanu, nishtunakashu kalipua etshi mashikanutsh napeu ahue. Ek apu uiesh ahimiat auelu, pitsheu nete uitsh. Katshi pitshet mak nete, utishkuem nete uapimeu eiii…kessua itakanu, tan kaitin uiti.. tanite kaiteten? Tan ka tutakuin? Ek kalipua tshi ahimihat nelu utishkuem, ahh… tshi mashau nete mashk^u ahue. Apu tshi napihik, apu tshi napihik mashk^u ahue. Nete nitamitsh ekute kaishepetat nia mashk^u apu tshi uapimuk kaitetet nete itakanu mashk^u aputsh uapemuk tanite ka… Tanite ishipitatshe itakanu ne utishekuem. Nete mak ui iu itemishui uaskat ahui nete?

Ilnu, napeutsh kalapa, pessish nete tshe nanitutatem kalipua katshi aititsh nelu napeu. Ek katshi uepetatau mak nelu  napeu e aimiatsh nete utishkuem. E uitamautsh katshi aititsh. Tan ka aititsh mak tan? Apu tapuetakau netshe napeutsh. Aihitaputsh kalipua. Tsheke nanitutshisselitananu ma, itelitemutshen, nituamatau ma mashk^u? Tsheke kuetshimakanu iatsh, etapuekueu iatsh napeu. Ek kalipua tshe pushita, nehutsh napeutsh tshe pushutau kie utshiu. Apu shutshimishkatsh kie e nehuta e uashehukau nelu shakahikaniu.

Katshi tukushenakau mak nete shipiss kapautsh kalipua nete. Ushkatsh ka mashitshanutsh mashk^u kie mak napeu. Tshika malatem kalipua ekueshash nishtunakun, miam etepelinanutsh, ekun ka ishinakutsh nete. Ka mashitshetau netshe mashk^u kie mak napeu. Ek kalipua tshe uapitemutsh kalipua ka ishitetau nete mashk^u kie mak napeu.

Ek ekute nete ititetau ek tshe uapitekau kie nishutsh nete ka mashitshetau ek kalipua minuatsh tshe ui… uapitamutsh kalipua tanite ka itutet ne mashk^u. Tshek ma, uapitem minuatsh, muk mukuiu uapitemutsh nete assiu e takutsh. Uapitem kie ka patshishek ne napeu. Ek kalipua uapitemutsh kie mashk^u tanite kahitetetsh ekun ne tshe itamuatau ekun ituetau, shash peshunakushu tsheshinash mashk^u itakanu. Katshi mak mutetau uelipishish uapitemutsh nete kutak tshekualu e uipautsh nete assitsh e miam e mashiek auen, mashk^u eshinikushit ahue.

Kushtamutsh kalipua tshetshi pessish nete itutetau. Ek itelitemutsh nema mishtik^u e tshinuashikatsh tsheke upashetananu tsheke tukuhuanu mashk^u. Ek tsheke kukuetshemakanu mak e tapuakue atshi napeu ka ituet ka mashat nelu mashk^u. Tshukuakanu ne mashk^u tshitshue apu matshit mashk^u. Ek kalipua peik aitutu napeu eshkuka kushtatshua pessish nete ituteu mashk^u e mashinitsh. Tshukueu nelu, tetshikueu nelu mashk^u nete upisheshkun.

Apu matshitsh mashk^u ahue, apu mitun matshitsh. Kalipua mak itelitem ne napeu, tanitek mashk^u eka ue pekupulua. Tshek ma kuessinieu mashk^u e uapimat mak nelu mashku tshek ma ui… nipu ne mashk^u. Ek ka aiashikuet kalipua, nipu ushen mashk^u. Ek mak kalipua netshe kutakutsh ilnuatsh mishta miluetamutsh ahue e nipitsh nelu mashk^u.

Tsheke tshiuetahanu itakanu, itueutsh netshe napeutsh, ka neutau, tshika tshiuetuanu ek utakussitsh tshika mishta mukushanun. Kie mak tshe niminanun akue, tshe utakussitsh. Ek kalipua tshe tshiuetuatau nelu mashk^u ahue. Ek mak nete katshi tukushekau nete utenatsh ka utshitau.

Tsheke pikushuakanu mashk^u. Miluetamutsh kalipua kassinu kalipua nete etatau utenatsh. Mishta miluetamutsh e peshuakanutsh nelu mashk^u ahue. Ek kalipua tshe mishta mukushuetau kie mak nelu pimiu tsheka upitshitautsh, tsheke tumunashutsh kie tsheke ueshushutsh netshe ilnutsh e pimiu e apitshitatau. Ek mak peikushueutsh nelu mashk^u. Tshek ma nete uteitsh uapimeutsh miam peikun e uipaitsh utei. E tun eka ishinakutsh tshetshi e uipaitsh kie mak eka mukunitsh mitun ahue, miam peikun e uiashkatsh ne mashk^u.

Ekun ma kaitunanutsh nutish ahue, ueshen mashk^u ahue, tshi akuakanu nete uteitsh miam ekun mak nelu ka nipihikutsh. Eshi natamuk tshi itakanutsh ka malelimakanutsh kie mak e tapuetik nelu kassinu tshekualu mashit ka itakanutsh, a ne ilnu ka ishmamat ne ilnu, ekun ma ka itanutsh nutish nameui nita kutsh malelimueu kutak auelu miam peikun ka tutuakanut miam mashk^u. Mashk^u ka nipihakanut muk nitumuk tshekualu ka itakanutsh. Mak peikun kie tshilanu tshipatshi nipahanu netshe ilnu, muk nitamuk itakanutsh.